બાળગીત

ગુજરાતી મારી માઁ,ને હિંદી છે મારી માસી,
હું તો ગરવો ગુજરાતી ને હું  છું હિંદ વાસી .

             એક્ડે  એક  ને  વન
                         કહેવું  મને  ના  ફાવે
            એક્ડા  પછી  તો
                    હસતો ગાતો બગડો આવે

ક કબૂતરનો ક, ક કલમનો ક મારે મન કાશી,
ગુજરાતી મારી માઁ, ને  હિંદી  છે મારી માસી.

            કેવી ટહુકા કરતી  કોયલ
                                 આંબા  ડાળે ઝુલે!
            હિંદી, ગુજરાતી  બોલીને
                       મારી છાતી ગજ ગજ ફૂલે.

કાગળ, કલમ ને કવિની એક જ છે તો રાશિ
ગુજરાતી મારી માઁ, ને હિંદી છે મારી માસી,

             'જલ',  એ, બી, સી, ડી  નો
                               ના  થાતો  તું  દાસ,
              ક, ખ, ગ, ને  ઘ પર
                               કરજે  પૂરેપૂરો  વિશ્વાસ.

અંગ્રેજી તો કાના માતર વગરની છે એક દાસી
ગુજરાતી મારી માઁ, ને હિંદી  છે મારી માસી,

કવિ જલરૂપ