અણમોલ શેર

*જ્ઞાન રતન ધન પાયો*

*ગુજરાતી સાહિત્યના અદ્ભુત શેર*


તારી આ નીચી નજર તો
કોયડો છે કોયડો,
થાય જો ઊંચી નજર તો
વાત કંઈ આગળ વધે.

*કિરણસિંહ ચૌહાણ*

હતાં સાથે સફરમાં એ બધાં
જણ ક્યાં ગયાં ?
હવે બસ હું ,નર્યું એકાંત ,
ને ખાલીપણું !

*સ્મિતા શાહ - મીરાં*

મિલનમાં જલદી વીતે છે સમય
વીતે ન વીરહમાં,
હકીકત એ  કે પસ્તાશો સમયથી
છૂટ લેવામાં.

*મહેશ શાહ*

તારી પહોંચ હોય  તો બસ  આટલું  તું કર,
તારા સ્મરણને મારા સુધી આવવા ન દે!

*લક્ષ્મી ડોબરિયા*

મારી હસ્તી મારી પાછળ એ રીતે
વીસરાઈ ગઈ,
આંગળી જળમાંથી નીકળી ને
જગા પુરાઈ ગઈ.

*ઓજસ પાલનપુરી*

તમારા ખુદના જીવનમાં
તમારો   કેટલો   ફાળો?

*કિરણસિંહ ચૌહાણ*

સાવ  નાજુક પારદર્શક પાંદડે  બેઠી હતી.
ઓસ  ફંગોળાય છે, આપને ક્યાં જાણ છે?

 *મહેશ શાહ*

વધુ શું હોય આનાથી તબાહીમાં;
સ્વજન સામે ઊભા છે સૌ ગવાહીમાં!

 *રવિ દવે 'પ્રત્યક્ષ'*

અધીરો છે તને ઈશ્વર બધું યે
આપવા માટે,
તું ચમચી લઈને ઊભો છે દરિયો
માગવા માટે?

*અનિલ ચાવડા*

દુનિયામાં મને મોકલી પસ્તાયો હતો તું,
મૃત્યુનું  બહાનું  કરી આ પાછો  ફર્યો લે.

*મરીઝ*

જીવ હજી તો ઝભ્ભામાં છે,
ફાટી ગઈ છે જાત કબીરા.

*ચંદ્રેશ મકવાણા*

ખુશાલીમાં અજાણ્યા પણ થશે
સામેલ મહેફિલમાં,
અને ગ઼મમાં દિલાસો લઈ ઉદાસી
એકલી આવે.

*મહેશ શાહ*

આભમાં કે દરિયામાં તો એક
પણ કેડી નથી,
અર્થ એનો એ નથી કે કોઈએ
સફર ખેડી નથી.

*રાજેશ વ્યાસ 'મિસ્કીન'*

ખૂલે નહીં જો શેર તો,
પાનાં-પકડ આપું તને?

*કુલદીપ કારિયા*

આ અહીં પ્હોંચ્યા પછીથી એટલું
સમજાય છે,
કોઈ કંઈ કરતું નથી બસ આ બધું
તો થાય છે.

*રાજેન્દ્ર શુક્લ*

હું ક્ષણોના મ્હેલમાં જાઉં અને,
કો'ક દરવાજો કરી દે બંધ તો!

*ચિનુ મોદી*

પાઈ દેવા પ્યાલી આજે સાંઈ
ઘરમાં આવશે,
એ મિષે મેં રાતભર ખુલ્લું જ
રાખ્યું બારણું.

*મહેશ શાહ*

જીવી શકું હું કઈ રીતે તમને સ્મર્યા વગર,
પાંપણ કદીયે રહી શકે મટકું ભર્યા વગર?

*મનહર મોદી*

સતત એની  ફરતે મજાનો ફરે છે,
ગ઼ઝલની ધરી છે, મુબારક કવિને!

*હિમલ પંડ્યા*

શ્વાસને ઈસ્ત્રી કરી મેં સાચવી
રાખ્યા હતા,
ક્યાંક અણધાર્યા પ્રસંગે જો
જવાનું થાય તો!

*અનિલ ચાવડા*

દીવાલોમાં પીપળની માફક  અહીં ,
ગઝલ  પાંગરી  છે   મુબારક કવિને!

*ગૌતમ પરમાર*

ઘર સુધી તું આવવાની જીદ ન કર,
ઘર નથી નહીંતર હું ના પાડું તને?

*ખલીલ ધનતેજવી*

મને સદ્ ભાગ્ય કે શબ્દો મળ્યા તારે
નગર જાવા,
ચરણ લઈ દોડવા બેસું તો વરસોનાં
વરસ લાગે.

*મનોજ ખંડેરિયા*

મળ્યો તું શબ્દ થઈને દોસ્ત મારો જે
ઘડી આવ્યો,
જીવનમાં રસ વધારે જીવવાનો  તે
ઘડી આવ્યો.

*મહેશ શાહ*

ભૂલ જો થાય મિત્રોની તો માફ કર,
જીભ કચડાય તો દાંત તોડાય નૈં.

*અનિલ ચાવડા*

સિગારેટને રસ્તા ઉપર આ રીતથી
ન ફેંક ભાઈ,
આ દેશમાં ચંપલ ઘણાં તળિયેથી
કાણાં હોય છે.

*ભાવિન ગોપાણી*

અફસોસ કેટલાય મને
આગવા મળ્યા,
ગાલિબને મારા શેર નથી
વાંચવા મળ્યા.

*ભરત વીંઝુડા*

સંપ માટીએ કર્યો તો ઈંટ થઈ,
ઈંટનું ટોળું મળ્યું તો ભીંત થઈ.

*અનિલ ચાવડા*

શ્રદ્ધાનો હો વિષય ત્યાં પુરાવાની
શી જરૂર?
કુરઆનમાં તો ક્યાંય પયંબરની
સહી નથી.

*જલન માતરી*

જિંદગીને જીવવાની ફિલસૂફી
સમજી લીધી,
જે ખુશી આવી જીવનમાં આખરી
સમજી લીધી.

*મરીઝ*

હું  મંદિરમાં આવ્યો, અને દ્વાર બોલ્યું,
પગરખાં નહીં, બસ અભરખા ઉતારો.

*ગૌરાંગ ઠાકર*

જત જણાવવાનું તને કે છે
અજબ વાતાવરણ,
એક ક્ષણ તું હોય છે ને એક ક્ષણ
તારું સ્મરણ.

*રાજેન્દ્ર શુક્લ*

રડ્યા ‘બેફામ’ સૌ મારા મરણ પર
એ જ કારણથી,
હતો મારો જ એ અવસર ને મારી
હાજરી નહોતી.

*બરકત વિરાણી ‘બેફામ’*

તફાવત એ જ છે,તારા અને મારા
વિષે, જાહિદ!
વિચારીને તું જીવે છે, હું જીવીને
વિચારું છું.

*અમૃત 'ઘાયલ'*

જીવનની સમી સાંજે મારે જખ્મોની
યાદી જોવી’તી,
બહુ ઓછાં પાનાં જોઈ શકયો, બહુ
અંગત અંગત નામ હતાં.

*સૈફ પાલનપુરી*

તમારી યાદ જો હઠ લઈને બેઠી
પાંપણો પાસે
પુરાવો પૂછશો તો એનો કોઈ નકશો
નથી પાસે.

*મહેશ શાહ*

તું કહે છે અશ્રુ ચાલ્યા જાય છે,
હું  કહું  છું  જિંદગી ધોવાય છે.

*શયદા*

વતનની ધૂળથી માથું ભરી લઉં ‘આદિલ’,
પછી  આ  ધૂળ  ફરી  ઉમ્રભર મળે ન મળે.

*'આદિલ' મન્સૂરી*

બસ, દુર્દશાનો એટલો આભાર હોય છે,
જેને મળું છું, મુજથી સમજદાર હોય છે.

*મરીઝ*

મોત વેળાની આ ઐયાશી
નથી ગમતી ‘મરીઝ’,
હું પથારી પર રહું ને આખું ઘર
જાગ્યા કરે.

*મરીઝ*

🙏🏽🕉🙏🏽